គន្លឹះ១០យ៉ាងជួយកុមារមានចិត្តគំនិតល្អ

បើចង់ឱ្យកុមារមានចិត្តគំនិតល្អ និង ព្រមទាំងអាចក្លាយជាមនុស្សល្អក្នុងសង្គមនាថ្ងៃខាងមុខនោះ ឪពុកម្តាយចាំបាច់ណាស់ត្រូវតែអនុវត្តនូវវិធីសាស្ត្រសម្រាប់តម្រង់ផ្លូវកូនតូចរបស់ខ្លួនពីឥឡូវនេះទៅ ។ នេះជាវិធីទាំង ១០ ដែលលោកអ្នកអាចអនុវត្តបានដូចជា ៖









១ – និយាយថា«អត់»ខ្លះ

ឪពុកម្តាយមិនត្រូវទិញរបស់ឱ្យគ្រប់យ៉ាងដល់កូនតូចរបស់ខ្លួនឡើយ បើទោះបីជាខ្លួនមានលទ្ធភាពទិញឱ្យក៏ដោយចុះ ។ ត្រូវតែគិតឱ្យបានម៉ត់ចត់ថា របស់ដែលត្រូវទិញឱ្យនេះវាគួរទិញឱ្យដែរឬទេ ។ ហេតុនេះបើឃើញថា មិនចាំបា់ចទេអ្នកត្រូវតែបដិសេធថា «ទេ» ប្រសើរជាង ព្រោះថា ការធ្វើបែបនេះ ដើម្បីឱ្យកូនបានរៀនយល់ដឹងពីរឿងការមិនពេញចិត្តរបស់អ្នកដទៃខ្លះបើពុំនោះទេគេអាចនឹងក្លាយជាកុមារចេះតែទារឱ្យខានតែបានមួយមុខប៉ុណ្ណោះ ។

២ – សម្តែងការអរគុណដោយទង្វើ

ក្រៅពីមានការបង្ហាត់បង្រៀនឱ្យកុមារចេះនិយាយអរគុណដល់ឪពុកម្តាយ ឬ អ្នកដទៃហើយ ក្រៅពីនេះត្រូវបង្រៀនកុមារឱ្យចេះលើកដៃសំពះអរគុណឪពុកម្តាយនិងចាស់ទុំផងដើម្បីសម្តែងក្តីស្រឡាញ់ដល់ឪពុកម្តាយ និង ការគោរពដល់ចាស់ទុំដទៃទៀត ។

៣ – បង្រៀនកុមារឱ្យចេះសរសេរប័ណ្ឌថ្លែងអំណរគុណ ឬ្ ធ្វើប័ណ្ណថ្លែងអំណរគុណជំនួសការនិយាយ

ត្រូវឱ្យគេសរសេរទៅតាមមនោសញ្ចេតនារបស់ខ្លួន ដើម្បីសម្តែងពីអារម្មណ៍និងការនឹកគិតចេញពីខ្លួនរបស់គេផ្ទាល់ ។ ការធ្វើបែបនេះ ក៏ជាបែបផែនមួយដែលបញ្ជាក់ពីក្តៅស្រឡាញ់ដែលមនុស្សជាច្រើនចង់បានវា ហើយជាកិច្ចឆ្លើយតបកុមារអាចបានទទួលមកវិញនូវក្តីស្រឡាញ់ ដោយពេលខ្លះលើសពីការនិយាយដោយផ្ទាល់ទៅទៀត ។

៤ – រិះរករកវិធីចិញ្វឹមកុមារ

គួរជជែកពិភាក្សាជាមួយតាយាយរបស់គេដើម្បីរកវិធីចិញ្ចឹមកុមារឱ្យបានល្អ ជាពិសេសត្រូវប្រគល់សេចក្តីស្រឡាញ់ការយកចិត្តទុកដាក់ជាមួយចៅច្រើនជាងការដែលឱ្យនំឬប្រាក់កាស ។

៥ – ជ្រើសរើសការចិញ្ចឹមកុមារទៅតាមបែបផែនសង្គម

នេះជាវិធីល្អមួយដើម្បីឱ្យកុមារធំឡើងអាចរត់ទៅតាមសង្គមទាន់គេ ប៉ុន្តែយ៉ាងណាមិនត្រូវបង្រៀនអ្វីដែលស៊ីវិល័យមិនល្អដែរ ពីព្រោះថាគេអាចក្លាយជាក្មេងមិនល្អណាមួយដែលនាំជះឥទ្ធិពលអាក្រក់នាពេលក្រោយវិញ ។ ត្រូវចេះជ្រើសរើសទាំងសង្គមបច្ចុប្បន្នបូកផ្សំជាមួយប្រពៃណីទំនៀមទម្លាប់ខ្លះ ដើម្បីឱ្យគេបានធ្វើការស្វែងយល់សម្រាប់រស់នៅក្នុងសង្គមល្អមួយនាថ្ងៃខាងមុខ ។

៦ – មិនត្រូវមួហ្មងជាមួយនឹងការបរាជ័យ

បង្រៀនកុមារឱ្យបានស្កាល់ពីអ្វីដែលជាការបរាជ័ខ្លះ ពីព្រោះថាការបរាជ័យ និង ការទទួលបានជោគជ័យដើរទន្ទឹមគ្នាជានិច្ចដើម្បីឱ្យគេអាចយល់ដឹង ហើយចេះខិតខំច្បាមយកភាពជោគជ័យដាក់ខ្លួននាពេលក្រោយៗទៀត ។

៧ – មិនត្រូវលើកស្ទួយឱ្យកុមារទិញរបស់របរច្រើនយ៉ាង

ប្រសិនបើកុមារចង់បានតក្កតា ត្រូវជ្រើសរើសមួយណាដែលគេចូលចិត្តបំផុតត្រឹមតែមួយបានហើយ និង ត្រូវចេះលើកសរសើរដល់កុមារថាបានជ្រើសរើសតក្កតាបានល្អ ដើម្បីជាការលើកទឹកចិត្ត ព្រោះថា ការធ្វើបែបនេះនាំឱ្យកុមារមានការពេញចិត្តលេងរបស់គេចង់បានមួយនេះ និង ពិសេសមានការសប្បាយចិត្តពីការជ្រើសរើសរបស់ខ្លួនគេថែមទៀត ។

៨ – ឱ្យកុមារយកសម្លៀកបំពាក់ ឬ របស់លេងបរិចាកឱ្យដល់អ្នកដទៃ

បើមានពេលត្រូវនាំកុមារទៅកាន់មជ្ឈមណ្ឌលបរិចាករបស់របរឱ្យបានញឹកញាប់ផង។ព្រោះថាការធ្វើបែបនេះ ដើម្បីបណ្តុះបណ្តាលឱ្យកុមារមានចិត្តសម្បុរសធម៌ និង គោរពដល់អ្នកដទៃកាន់តែច្រើនឡើង ។

៩ – បង្រៀនកុមារឱ្យស្គាល់តម្លៃប្រាក់កាស

បង្រៀនកុមារឱ្យចេះសន្សំប្រាក់ និង ពិសេសមានគម្រោងសន្សំច្បាស់លាស់ ប្រសិនបើមានការបង្រៀនកុមារតាំងតែពីក្មេងៗ នឹងមានមូលដ្ឋានក្នុងការគ្រប់គ្រងប្រាក់កាសបានល្អ មានភាពស្មោះត្រង់ និង ចេះក្នុងការសន្សំថែមទៀត ។

១០ – បញ្ជាក់ប្រាប់ពីបទពិសោធន៍របស់ខ្លួនឱ្យកូនតូចដឹង

ដើម្បីជាគំរូដល់កូនវិញ ឪពុកម្តាយចាំបាច់ត្រូវប្រាប់កូនពីការអ្វីដែលខ្លួនបានខិតខំកសាងគ្រួសារតាំងពីមុនរហូតមានដល់ពេលបច្ចុប្បន្ន ហើយបើគ្មានការខិតខំណាមួយទេនាពេលនេះក៏មិនមានអ្វីៗទាំងនេះដែរ ។ ត្រូវពន្យល់ប្រាប់គេពីការខិតខំការងារ និង ការរកប្រាក់កម្រៃបានយ៉ាងដូចម្តេចដើម្បីឱ្យកូនបានដឹងពីរាល់ឧបសគ្គផ្សេងៗ ហើយគេមានហេតុផល ចេះគិត និង ចេះដឹងពីតម្លៃផ្សេងៗបានកាន់តែច្រើនឡើង ៕